राज्य शासकीय कर्मचाऱ्यांना 2% महागाई भत्ता [GR] वाढ शासन निर्णय निर्गमित
महाराष्ट्र शासन
वित्त विभाग
शासन निर्णय
दिनांक : ११ ऑगस्ट, २०२५
विषय: राज्य शासकीय व इतर पात्र कर्मचाऱ्यांना अनुज्ञेय महागाई भत्त्याच्या दरात दिनांक १ जानेवारी, २०२५ पासून सुधारणा.
१. राज्य शासकीय कर्मचारी व इतर पात्र पूर्णकालिक कर्मचाऱ्यांना अनुज्ञेय महागाई भत्त्याच्या दरात सुधारणा करण्याचा प्रश्न शासनाच्या विचाराधीन होता.
२. शासन असे आदेश देते की, दिनांक १ जानेवारी, २०२५ पासून ७व्या वेतन आयोगानुसार सुधारित वेतनसंरचनेतील मूळ वेतनावरील अनुज्ञेय महागाई भत्त्याचा दर ५३% वरून ५५% करण्यात यावा. ही महागाई भत्ता वाढ, दिनांक १ जानेवारी, २०२५ ते ३१ जुलै, २०२५ या कालावधीतील थकबाकीसह, माहे ऑगस्ट २०२५ च्या वेतनासोबत रोखीने देण्यात यावी.
३. महागाई भत्ता प्रदान करण्यासंदर्भातील विद्यमान तरतुदी व कार्यपद्धती यापुढेही यथावत लागू राहतील.
४. यावर होणारा खर्च, संबंधित शासकीय कर्मचाऱ्यांचे वेतन व भत्ते ज्या लेखाशीर्षाखाली खर्ची टाकण्यात येतात त्या लेखाशीर्षाखाली आणि मंजूर अनुदानातून भागविण्यात यावा. अनुदानप्राप्त संस्था व जिल्हा परिषद कर्मचाऱ्यांच्या बाबतीत, संबंधित प्रमुख लेखाशीर्षाखालील ज्या उप-लेखाशीर्षाखाली त्यांच्या सहाय्यक अनुदानाचा खर्च नोंदविला जातो, त्याच उप-लेखाशीर्षाखाली हा खर्च नोंदविण्यात यावा.